《ꊿꋅꋋꁯ》

作者：吉克尔杰

朗诵：勒尔吉哈 

ꊿꋅꋋꁯ

ꅽꂓꆏꄜꄎꌬꀕꇬꎷ

ꉠꅇꉢꉉꉼꏒꀕꇬꎷ

ꆎꑌꀉꁌꂓꅑꇖꉬꄷ

ꉡꑌꀋꁧꂒꋦꌺꉬꄷ

ꏃꇖꊇꄮꀿꃼꀿꎹꀋꊌꌦꂾ

ꅽꂓꆏꌌꈍꃅꄜꀋꐚ？

ꉠꅇꉢꌌꈍꃅꉉꀋꐚ？

ꂿꉒꃴꁮꃴꂷꁱꀕꋑꋓ

ꃅꄉꄜꂯꅀ？

ꅉꄩꊖꏂꊖꆈꏁꏂꆇꆈ

ꃅꄉꉉꂯꆏ？

         ——ꇬꅇ

ꋥꆹꆈꒉꅶꁉꋦ

ꀀꆹꃄꇖꅔꊂꀀ

ꉎꆏꈬꉻꋦꁍꐛ

ꐰꆏꐈꆃꀀꁍꐛ

ꐧꆏꆺꀕꃄꉻꐛ

ꃻꆏꅉꁮꋦꁍꐛ

ꑲꆏꅉꎹꀀꁍꐛ

ꅶꁉꀋꎞꋦꑴꌦ

ꍤꁆꃭꌒꀀꑴꌦ

ꋍꁯꋍꄷꋦ

ꋍꉏꆹꏮꅑ

ꅽꂓꄡꇗꆏꄜꄎꌬꀕꇬꎷ

ꉠꅇꄡꇗꉢꉉꉼꏒꀕꇬꎷ

ꅜꆹꀉꂿꑍꅝꀠ

ꐝꆹꋊꇁꃣꐊꐞ

ꐝꆏꐝꅉꈜꎴꁧ

ꊾꂓꊿꑞꐛꄉꐞ

ꃥꐞꌊꐊꁧꃅꐞ

ꈢꈐꈢꉈꇢꄉꐞ

ꃣꐞꌐꐛꁧꃅꐞ

ꁭꅐꁮꐚꋦꄉꐞ

ꈭꇁꈛꐞꌟꃅꐞ

ꈛꐞꎵꑳꀕꄉꐞ

ꒉꇁꃪꐞꌟꃅꐞ

ꒊꃀꒈꌺꁘꄉꐞ

ꀀꀽꀋꊨꆏ，ꐭꉙꀋꐊꃅꄉꐞ

ꑋꀽꀋꊨꆏ，ꄓꉗꀋꐊꃅꄉꐞ

ꐞꌊꁭꅐꁮꐚꋦꄿꂿ

ꐞꌊꒈꀑꒈꂪꀀꄿꂿ

ꅽꂓꆏꄜꄎꌬꀕꇬꎷꑴꌦ

ꉠꅇꉢꉉꉼꏒꀕꇬꎷꑴꌦ

ꀃ—ꀂ

ꊾꂓꊿꈨꀋꇎꑠꁯꑌꀋꐥ

ꒊꄝꉛꈩꀋꑠꇎꂷꑌꀋꐥ

ꃪꅪꐚꎑꀋꇎꑠꀽꑌꀋꐥ

ꈀꄸꑌꀉꁌꂓꅑꇖꉬꄷ

ꈀꄸꑌꀋꁧꂒꋦꌺꉬꄷ

ꀉꁌꂓꅑꈍꃅꅑꌠꉪꋺꀕ？

ꀋꁧꂒꋦꈍꃅꋦꌠꉪꋺꀕ？

ꀀꇷꀂꀋꄙꇁꋍꑍ

ꀉꁌꂓꉪꌌꄚꄉꒉꋩꃹꇮꇬ

ꈍꃅꂯꌠꈀꄸꋌꉨꋻ？

ꀀꊋꀂꀋꑌꇁꋍꑍ

ꀋꁧꂓꉪꌌꄚꄉꈑꋍꍀꇮꇬ

ꈍꃅꂯꌠꈀꄸꋋꅲꋺ？

ꀉꁌꂒꉻꉪꌌꎧꊰꅝꄹꉇ

ꀋꁧꄉꃤꉪꌌꅋꀠꅝꄹꉇ

ꆀꐪꈻꇁꉱꁧꍣꅹꉫꉬꑌꀋꐚ？

ꆀꐪꉼꇁꑳꃴꄀꆐꉫꀕꑌꀋꐚ？

ꆀꐪꀘꌊꃪꃹꊐꅹꉫꉬꑌꀋꐚ？

ꐥꐨꈝꃀꈛꏦꇿꇬꁮ？

ꋦꑭꊫꂫꃰꇌꇿꇬꐛ？

ꏃꀵꈁꀳꃪꅪꈬꊂꏮꄉꀿꃼꆹꇬ

ꉪꀿꉪꃼꊊꀕꑴꌦꂯ？

ꃆꇁꒆꐊꋪꀕꁍꃴꉜꄉꀿꎹꆹꇬ

ꉪꀿꉪꎹꊊꀕꑴꌦꂯ？

ꀋꄸꄷꀿꃼꀿꀋꊌꇁꇮꇬ

ꊿꋅꋦꑭꇿꇬꌆꇈꂯ？

ꀋꄸꄷꀿꎹꀿꀋꊌꇁꇮꇬ

ꊿꋅꊧꏣꇿꇬꊛꇊꂯ？