《想妈妈ꀉꂿꉂ 》
作者:吉觉佳佳
朗诵:俄木阿鸿
ꀉꂿꉂ
ꀉꂿꀋ
ꆏꁧꇈꉈꉡꆹꀋꉂꑠꑍꇬꀋꐥ
ꀀꂼꂻꐛꇁꄭꇬ
ꇬꇉꈺꍠꀕꇬꎷ
ꆎꆹꏂꆨꃰꌦꐊꄉꐰꌠꇊ
ꆏꁧꄹꉇꌠꃰꐛꐍꎭꀕ
ꋧꃅꋋꂷꐈꇁꂪꌦꀊꐎꌡ
ꉪꆹꉌꃶꑓꋩꉨꃚꁡꇤꁨꇊꉼ
ꇢꇑꉈꄉꑓꁴꉐꌦꌵ
ꑓꁴꊰꇁꇤꈒꃆꄔꀉꂿꏦꄉꇣꌠꌸ
ꃆꄔꄚꄉꌦ
ꀉꂿꄚꄉꐞ
ꀉꂿꇳꑌꉐꀋꅲ
ꄕꑌꄓꀋꅲ
ꀉꂿꀋ
ꋌꃢꆎꆹꃶꐚꃅꐙꄏꀐꅀ
ꀿꌗꃀꌗꊷꆣꀕ
ꃰꌗꉈꌗꈺꍠꀕ
ꌩꃀꈀꋦꊨꊭꏮꏑꏿ
ꀿꃀꈀꐥꌺꇖꏮꏑꏿꄷꌠ
ꀉꂿꃰꌗꋍꇱꀉꄂꆏꊏꅪꁳꇊ
ꀉꂿꉌꇨꋍꎳꎵ
ꅩꇽꊁꆹꎭ
ꐚꍸꁬꈬꃰ
ꅩꍸꈵꁱꈠꇈꃲ
ꀉꂿꇆ
ꃰꐛꃱꁍꈉꌦꐮꌦꃅ
ꆎꆹꑞꃅꏮꀋꇁ
ꒈꅐꒉꌤꄓꌦꑍꌦꃅ
ꆎꆹꑞꃅꀱꀋꇁ
ꃅꃴꈭꏂꈭꍪꀕꉘꐥꌠꑌ
ꋍꈓꋍꃢꏮꑴꂼ
ꆎꆹꑞꃅꏮꀋꇁ
ꈭꏂꇗꈭꀕꄮꇬ
ꅩꍸꃀꉂꇖꈭꀕꀐꂼ
ꇉꄩꇪꀮꀋꁮꇉꉱꐥꌠꑌ
ꋍꈓꋍꃢꀱꑴꂼ
ꆎꆹꑞꃅꀱꀋꇁ
ꇪꀮꃀꉂꋌꄷꑌ
ꃀꅇꋍꇬꀕꀋꐊꀐꂼ
ꀉꂿꇆ
ꄾꆏꋍꈓꌘꏮꀕ
ꂸꄿꌕꈎꋍꏮꀕꑌꄿꑴꂼ
ꆺꑳꀉꂿꑠꂷꑌ
ꑳꉎꁧꐙꀉꒉꂶꌠ
ꀊꆨꀉꂿꁮꆫꁮꅸꐚꍝꐙꃰꏿꄉꐹꅉꉬ
ꀃꑍꋍꄮꍀꆿꈳꅉꐛꇈꃲ
ꁧꐙꁦꆹꎴ
ꀉꂿꉂꏣꄚꈿꎴꀐꂼ
ꑲꐮꐦꐛꀉꒉꂶꌠ
ꀊꆨꀉꂿꑘꃅꋚꑣꇵꂷꅧꇗꀕꃅꐹꅉꉬ
ꀃꑍꋍꄮꏰꌺꋵꅉꐛꇈꃲ
ꐦꐛꐦꆹꎴ
ꀉꂿꉂꏣꄚꈿꎴꀐꂼ
ꑳꂾꇱꋓꏡꌠ
ꀊꆨꀉꂿꌩꏓꒉꇸꑭꃶꈝꃀꍬꄉꐹꅉꉬ
ꀃꑍꋍꄮꈛꁧꏜꋇꀉꄂ
ꌦꀕꄓꌦꃅꇈꃲ
ꃀꉂꇱꋓꍬꂯꑌ
ꍬꀕꈤꆹꇐ
ꃀꉂꈤꀋꉆꀐꂼ
ꀉꂿꀋ
ꀈꉙꑗꒉꑍꇁꌊꒉꏿ
ꅩꍸꃀꉂꑍꇁꌊꉂꏿꇈꃲ
ꎹꄓꃀꉂꑓꁴꀑꈑꇉ
ꂸꆧꃀꉂꑭꃶꈝꃀꍬ
ꁯꋒꃀꉂꏁꁏꀑꊥꑌ
ꌋꐓꃀꉂꀀꐚꐝꍠꀕꇈꃲ
ꌞꃀꂾꆏꅩꍸꇬꇉꑓꁴꊰꇈꃲ
ꑿꆨꌋꈻꈘꉆꑌ
ꀉꂿꉂꏣꈘꀋꉆꀐꂼ
ꃮꆪꉐꌦꈘꉆꑌ
ꀉꂿꉂꏣꈘꀋꉆꀐꂼ
ꍴꈌꊸꑭꈘꉆꑌ
ꀉꂿꉂꏣꈘꀋꉆꀐꂼ
ꏂꆨꃰꌦꈘꉆꑌ
ꀉꂿꉂꏣꈘꀋꉆꀐꂼ
ꎾꃚꎿꒉꌤꉆꑌ
ꃀꉂꑓꁴꈤꀋꉆꀐꂼ
ꆺꑳꀉꂿꑠꂷꑌ
ꈻꑍꉒꐊꂿꇁꑟ
ꊸꑋꄂꐊꂿꇁꑟ
ꌞꊿꀿꇁꃀꐮꏮꏑꏿꁧꄮ
ꅩꌺꇿꇬꉜꄉꁧꂯꇆ
ꌍꑓꉆꄉꏮꇁꌤꇠꉜ
ꋠꇐꋚꎔꋍꑖꑘꌠꃼꌊꈀꄸꍈꁧꂯ
ꃢꃅꈚꎔꋍꑖꑘꌠꃼꌊꈀꄸꇢꇊꂯ
ꅩꌺꉌꂵꑱꉀꌟꃅꉀ
ꀉꂿꆎꆹꎭꐥꎭꌦꏽꂷꉬ
ꀉꂿꆎꆹꅩꉘꈀꎭꀕꂶꉬ
ꀉꂿꑆꊋꈍꃅꋋꀱꂯ
ꀉꂿꉂꐪꈍꃅꄀꇊꂯ
ꉌꆐꅑꐪꀉꄁꍸꇁꅩꌺꁳꇈꃲ