ꌶꌺꎆꎔꎹꈜ꒜
ꁱꊿ：ꉊꆽꏦꏣ
ꀁꇬꐥꇬꆹ
ꃅꃴꎆꊰꇁꑵꉬꎼꈁ
ꃅꅉꎆꁖꇁꑵꉬꎼꈁ
ꃰꐛꈌꌦꇁꑵꉬꎼꈁ
ꀿꃀꎆꎹꌒꑵꉬꎼꈁ
ꋚꎔꀋꋠꑳꉨꃀꐏꑌ
ꃢꎔꀋꈚꇇꎇꃀꐏꉆ
ꀿꃀꎆꌌꎸꃚꃙꋠꆹ
ꎸꃚꋠꇬꂄꌠꌟꃅꐛ
ꀿꃀꎆꌌKTVꇬꈩ
ꈩꇁꀜꌒꌟꃅꐛ
ꎧꏸꑍꇉꅝ
ꀉꑳꑕꑘꄷ
ꀿꃀꅇꐚꎺꄉꌧꇐꌷꂯꑌ
ꅇꂷꇿꊰꇈꀋꐚ
ꀿꇁꃀꅇꏂꅪꈬꒀꁌꌟꑌ
ꅳꀧꇀꃼꅱꆏꇀꑳꁖ
ꊿꌌꇬꄉꉉꇬꆹ
ꉷꃅꇓꈓꇇꃅꇇꑘꃄꅉꇬ
ꎆꎔꀋꎹꉈꉩꀕꑴꄷ
ꈩꇁꀜꅍꐥꑴꄸ
ꉷꃅꑳꂿꉻꏑꀕꑴꄷ
ꑭꏸꂮꄉꏦꈜꊪꑴꄷ
ꉷꃅꍣꋚꃮꎷꐥꑴꄷ
ꇇꏸꂮꄉꎋꅪꌬꑴꄷ
ꉷꃅꂱꇩꃧꃨꋽꐪꆹ
ꆀꃅꂙꃨꏭꀋꋌꑴꄷ
ꑕꑘꇁꌊꉷꃅꇓꈓꑟ
ꊋꃅꎆꎹꆹꏢꉪ
ꊋꃅꅉꇬꑘꃅꇁꋍꑍ
ꌧꇐꂾꇐꀁꑌꇨ
ꉪꇐꏡꇐꀉꑌꇨ
ꊿꌌꈌꊨꃅꄉꊨ
ꊿꌌꃮꏈꃅꄉꏈ
ꈁꍻꑓꍻꊿꐏꉆ
ꁌꄝꂴꆽꌌꁈꇤꑭꇨꃅꇨ
ꊨꏦꈝꃀꊨꏦꍬꀋꄏ
ꉌꃀꁑꊰꀕ
ꇁꌊꉷꃅꇓꈓꑟꈭꐨ
ꀿꇁꃀꉂꆹ
ꉂꅇꄜꅉꎴꁧꃲ
ꃀꇴꃀꀋꀱ
ꀿꇴꀿꀋꉐ
ꑕꑘꉂꏣꆀꃅꏣꇈꃲ
ꌶꌺꇆꌶꌺ
ꎔꎗꃅꄉꊋꇤꌧꇐꌷꅊꇈ
ꉪꇁꉷꃅꎆꎹꁧꌠꆹꄡꄀ
ꌞꅇꀀꅇꆹꄡꑇ
ꀃꑌꑲꆀꉢꅉꐚ
ꀿꃀꅩꎭꌧꇐꌷꌠꆹ
ꊂꇁꋍꑍꐥꌑꄻꌒꋉꄷꌠ
ꏃꊰꋋꂿꇇꃀꄖꎻꂿꄷꌠ
ꉆꊰꋋꂿꇇꁮꏪꎻꂿꄷꌠ
ꀉꑳꑕꑘꑠꍈꑌ
ꄓꇁꑌꅉꃅ
ꌊꆏꑓꏮꆪꌺꉜ
ꆪꑭꐍꐷꀕ
ꀉꂿꆪꑭꇂꃴꑋꑌꀕꀋꐚ
ꆪꑭꀉꂿꑓꁴꌨꌩꑌꀋꐚ
ꑍꆏꑓꏮꈧꌺꉜ
ꈨꑭꅩꌬꀕ
ꈨꑭꇂꃴꀉꂿꇵꂷꆺꀕꂃ
ꉌꃀꁦꀑꉪꄎꆏ
ꐰꇑꄝꇁꁧꑭꆹꄡꊰ
ꎆꎔꈜꃀꆹ
ꌧꇐꁱꂷꀂꏽꁮ
ꊋꇤꌧꇐꌷꑲꆏ
ꌧꇐꎆꅑꇁꅊꈫ
