ꆀꃅꈎꏅ
ꁱ:ꀊꑞꀈꉐ
ꀘ:ꂚ ꁰ ꅐ
ꃅꑍꋚꀋꍈ,ꃅꉖꒉꀋꄐ。ꃅꈎꃅꆪꑠꑵꑌꑍꇁꌊꒉꏿ,ꇓꂃꄓꃅꄓ,ꀋꌋꀕꃅꁧ,ꀋꌋꀕꃅꇁ。ꀋꋓꀋꉪꃅꋍꈓꋍꃢꆀꃅꆈꌠꈎꏅꑟꇁꌦꀐꅊꇈ。
ꍴꊂꌕꆪ,ꒊꃀꌙꈈꀕ,ꁦꇉꅡꊪꀕ,ꅔꈌꏂꆘꆚ。ꁦꀑꁧꄩ、ꇉꈫꇁꄿ、ꑳꈫꑳꇋꌩꏾꇓꏾꑍꇁꌊꏂꏿ,ꐻꇁꉈꒃꋍꑍꋍꍈꃅꈤꒉꃲ。ꑳꐮꒊꃀꒉꃴꉜꏂꑵꌠꀜꐥꀜꆗꏿ,ꆀꃅꁡꇤꐧꇁꃰꊿꑊꑍꒊꆭꀕ。ꏮꇁꆀꃅꇖꈋꉜ,ꈁꉜꈀꋽꀕ,ꈁꉜꈁꎔꎗ。ꉜꇊꉂꑟꅑ,ꉪꇊꊽꉌꐡ。
ꈎꈤꇀꆏꏅ,ꆪꈤꇀꆏꊒ。ꃰꊿꋬꂻꆏꈎꏅ,ꍆꀕꋬꂻꆏꈌꏑ。ꃅꈎꃅꆪꆹꈎꏅꃮꀠꌌꊨꄅ,ꃅꑍꃅꉖꆹꈧꇁꆪꌺꌌꊨꄅ。ꆀꃅꆈꌠꈎꏅꌠꆹ,ꊿꇬꋬꂻꏅ、ꑌꑿꀹꎆꏅ、ꆿꍯꂷꌵꏅ、ꉌꇿꑓꇿꏅ、ꋯꑌꃰꉻꏅ、ꎭꇔꈚꐛꏅ。
ꆺꑳꀉꂿꑠꂷꑌ,ꈎꄐꄉꃮꉘꑍꌋꄉꎧꏿ。ꆺꑳꀉꄉꑠꂷꑌ,ꇉꈫꇁꄿꏮꇵꂷꅧꇗꀕꃅꈎꏅꌩꁐꋲ。ꆺꑳꀉꐔꑠꈨꑌꁦꀑꁧꄩꏹ,ꌩꏪꇓꏪꂇꄉꈎꏅꅘꁧꒇ。ꈎꏅꃮꀠꀋꋆꇚꑴꉂ,ꆺꑳꀉꂿꃮꋚꋍꑍꌕꃢꍈ;ꆺꑳꏂꃴꀋꎔꇚꑴꉂ,ꅫꇁꌱꃀꋍꑍꌕꃢꌩ;ꌬꀮꌬꀏꀋꎔꇚꑴꉂ,ꅫꇁꌱꃀꋍꑍꌕꃢꋌ。
ꀊꆨꆀꃅꆈꌠꐥꐨꆹꎭꃅꈧꊰꀕ,ꀃꑍꀋꃅꋋꄮꆹꎭꇔꈚꐛꐥꐨꐚꒉꅿ。ꈎꏅꆪꆗꄮꆺꑳꀿꃀꍔꇁꑋꅉꃅꑊꑍꒊꆭꀕ,ꄈꅿꇗꅉꈨꑭꌟꃅꐼꇉꀕ,ꆃꎭꆈꌠꎭꇔꈚꐛꉌꃀꊷꆣꀕ。ꇭꍣꄈꆹꌺꈐꌺꉈꀋꐥ,ꇭꍣꄈꆹꀉꂿꀉꄉꌡ,ꀉꂿꀉꄉꑆꊋꀱꌐꉆꑌ,ꇭꍣꄈꑆꊋꀱꂸꌐꉆꃲ。ꀃꑍꋋꄮ,ꅔꐎꏰꌺꋶꃅꌒ,ꇉꄩꇪꀮꂾꃚꌒ,ꐧꇁꃰꊿꒈꃚꉏꃚꌒ。ꄈꅿꍔꊱꇗꅉꉾꃪ,ꃅꋊꀊꏀꄇꈜꁨꇉꀕ,ꎭꇔꈚꐛꈝꃀꎵꑳꀕ。ꋯꑌꆏꊋꒉ,ꋯꑌꆏꌗꎴ。ꆀꃅꁡꇤꆀꃅꆈꌠꊫꂫꈜꀕꌒꎂꀕ。
ꆿꆪꏮꁦꏂ,ꌨꏾꇓꏾꏂ。ꄩꆹꈭꇁꃹꈴꆨ,ꀏꆹꅫꇁꌱꈴꆨ。ꀿꃀꈀꐥꅉꌺꇖꏮꏑꏿ,ꌩꃀꈀꋦꅉꊨꊭꏮꏑꏿ。ꆀꃅꆈꌠꊂꋊꊁꒆꊈ,ꉇꄅꇩꏤꐥꌠꉬꄿꂿ,ꉷꃅꇓꈓꌤꃅꆿꃅ、ꎆꎹꋚꈹꌠꉬꄿꂿ,ꁭꅐꐥꌠꁮꐚꏮꏑꇁꅊꇈ、ꒈꀑꐥꌠꒈꂪꏮꏑꇁꅊꇈ、ꉷꃅꐥꌠꆀꃅꏮꏑꇁꅊꇈ。ꄩꆹꃅꃴꃏꏸꐛꑿꈴꃅꈴ,ꆀꃅꆀꌺꃅꃴꃏꏸꑌꄉꇀꇰꃲ;ꀏꆹꐕꇁꉺꍯꇓꂃꄓꃅꄓ,ꆀꃅꆀꌺꐕꇁꉺꍯꑌꄉꇀꇰꃲ;ꆂꒉꒊꃀꄇꇉꀒꆷꉜꏂꆗꃅꆗ,ꆀꃅꆀꌺꄇꇉꀒꆷꑌꄉꇀꇰꃲ。ꃅꃴꈭꏂꋍꈓꋍꃢꏮ,ꈭꇁꈜꎴꌠꆀꃅꆀꌺꀿꇁꃀꐮꑟꇁꃲ,ꈌꆹꂿꉘꁍꇁꀿꃀꍈꇁꃲ。ꀿꐰꌺꈩꌒ,ꃀꐮꅪꈧꌒ。ꆀꃅꁡꇤꑲꋦꐛꁮꄅ、ꑷꂿꉼꏒꀕ、ꄆꄑꏂꌬꀕ,ꆀꃅꁡꇤꈏꃆꄔꏁꇅꀕꇁꃲ、ꑱꈐꒈꃚꉏꃚꎓꁨꀕꇁꃲ、ꁡꇤꁨꇊꆏꒉꉢꇁꎓꁨꀕꇁꃲ、ꆺꑳꀿꃀꏦꁁꇗꄃꀕꇁꃲ。
ꈎꏅꆪꆗ,ꀑꀮꈆꌒꁧ;ꎭꁻꎭꏿꆹ,ꀋꒀꀉꑣꁧ;ꑮꑭꅪꏷꆹ,ꏃꇁꊇꄮꁧ;ꑲꋉꇣꄉꆹ,ꁴꇑꌺꍸꁧ;ꃆꉉꑘꉉꆹ,ꃀꈈꄹꎐꁧ;ꌉꈿꁻꏤꆹ,ꌅꂮꀊꏸꁧ;ꃈꇁꈄꌠꆹ,ꉱꑴꄺꈯꁧ;ꑱꍹꐞꄜꆹ,ꁍꃀꅩꒌꁧ;ꋙꊪꒉꏽꆹ,ꏷꏸꅪꎔꁧ;ꅋꁧꑱꁧꆹ,ꐱꑴꎰꆈꁧ。
ꆀꃅꆈꌠꈎꌋꆪꄐꄉꁍꇁꉚꀿꇁꉚ,ꎧꎔꎸꎔꌌꇁꁍꇁꀿꃀꍈꏭꄐ,ꋚꂂꒉꎔꌌꇁꁍꇁꀿꃀꍈꏭꄐ,ꃢꃅꈚꎔꌌꇁꁍꇁꀿꃀꇢꏭꄐ,ꁍꇁꀿꃀꊈꆹꀅꌳꀅꌳꃅꇁꅊꇈ。
ꈎꃅꆪꌒꇣꋦꉘꁇꁉ,ꑍꃅꉖꌒꆲꏂꂱꇬꀕ。ꈎꏅꌕꑍꆏꋠꇁꅝꅍꐥ,ꑮꑟꌕꑍꆏꈩꇁꀜꅍꐥ,ꊿꀘꌕꑍꆏꆫꇁꃬꅍꐥ。ꋧꃅꐧꃅꆈꌠꌺꇖꋍꏅꊈ,ꈎꏅꃅꌒ、ꊿꇬꋬꂻ、ꑌꑿꀹꎆ、ꆿꍯꂷꌵ、ꎆꎹꎆꐛ、ꋚꎷꋚꊌ。ꊂꋊꊁꒆꌧꇐꂿꇐꌷꌠꊈꌧꇐꀻꎆ、ꂿꇐꉀꎆ。ꇩꏤꌤꃅꆿꃅꊿꈀꄸꑌꉋꆹꉪꐨꐊ,ꇇꆹꃅꐪꐊ,ꑬꆹꄔꐪꐊꅊꇈ。
ꆀꃅꈎꏅ,ꊿꇬꋬꂻꇁ,ꑌꑿꀹꎆꇁ,ꆿꍯꂷꌵꇁ!