ꈎꏅꏤꅇ
ꁱ:ꈥꉪ
ꀘ:ꀍꃅꀈꉼ
ꀊꄶꈨꑭꏁꌬꀕꃅꆳꂱꇬꀕꑠꑍ
ꉠꀉꃰꉣꑊꅇꂷꇬꐯꏤꄉ
ꎼꈎꆏꈎꏅꃮꀠꀉꒉꐯꀉꒉꑠꂷꉘꉢꄉꑴꄷ。
ꉠꀉꃰꆹꆀꃅꁡꇤꎃꐛꊿꂷ,
ꋍꎃꐛꌊꋍꐥꍂꃅꃄꅉꇇꁮꒊꁆꌋꆀꐯꐍꅸꐛꂾꉆꊰꈎꀐ!
ꊖꆈꋍꁕꋍꑊꉂꏣꉂꑟꆹꈀꄸꋌꄜꌐꂯ!
ꑠꐛꅹꋍꌺꋍꇖꈀꄸꈍꃅꉉꑌꋍꇬꀀꇙꁧꀋꅲ,
ꑠꐛꅹꀋꃉꀊꄶꁧꐙꁡꇤꀀꑴꌦ。
ꐰꇑꑋꅉꑌꈐꉘꉆꅉꉆꐤꁮꄉ,
ꉘꇉꉘꀋꅐꃅꉡꑌꐈꌌꁌꄝꂽꑼꋍꂷꐛ,
ꄚꉠꉌꐡꅑꌠꆏ
ꉠꃷꇎꃷꇤ、ꉠꀉꄉꀉꂿ、ꉠꃀꑌꀿꃶ
ꉠꀉꁌꀊꂵꈀꄸꑌꉢꇬꀋꂿꃅꄉꇁꀐ。
ꀊꅰꀊꅰꃅꌠꆏꉠꀉꃰꑌꉢꇬꊌꀋꂿꄷꀋꁧꋌꇫꅉꀋꐛ
ꑠꃅꄉꉢꉌꐒꌠꋍꁁꏯꉌꐡꌠꋍꁁꏯꇁꌊꁍꇩꃅꋮꆹꏮꑟꀐ!
ꀋꄸꄷ
ꉠꀉꃰꉢꂽꄻꁧꌠꋌꅉꇮꇬꆹꋌꈍꃅꉌꂵꇿꇮꀋꐛ,
ꄐꀕꄏꄹꃷꇎꃷꇤꌋꆀꈁꄽꄏꌦꀐꋭ。
ꀃꑍꃅꒉꆈꏸꀕꑠꉖ
ꃅꆳꆲꏂꐊꑠꉔ
ꉢꅞꇁꑳꁥꂷꉐꁿꅉꌺꍈꇂꃴꑌ,
ꑓꋪꉈꀋꈻꃅꏮꈜꎴꅉꉜꄉ
ꀋꄸꄷꀋꃅꋋꄮꆏꀁꇬꐥꇮꇬ,
ꃤꃀꆜꌺꍈꌠꉣꑊꐮꄌꅷꇉꅶꁮꆗꇬꈎꏅꌩꏓꐺꀐꋭ,
ꌩꁐꍻꄹꍻꇵꂷꍻꄹꍻ,
ꌩꁐꈍꑋꏢꀉꁌꁮꅉꈍꑋꂷꌧꀐꋭ,
ꉠꒉꃚꇁꄿꉼꌦꀐꋭ
ꉠꑓꁴꌩꐑꀕꌦꀑꋭ
ꉠꉌꃀꁨꐞꄑꌦꀐꋭ
ꄚꉢꇬꉨꀋꀬ
ꉢꇬꉨꀋꀬꌠꆏ,
ꌞꊿꌩꁐꎆꇌꀕꀐꇬꉠꀉꃰꈎꏅꌩꁐꌩꏓꌠꊌꀕꀋꐛꀐꂼ!
ꊌꄷꇬꑌꌩꎞꌩꃶꆹꌠꊌꊋꀋꐛꀐꂼ;
ꀋꄸꄷꀋꃅꋋꄮꉢꀁꇬꐥꇮꇬꆹ,
ꉎꈭꐨꑭꑐꁦꀑꆹꇮꋭ,
ꁦꀑꃅꆳꈺꌋꀕꈨꑭꊷꆣꀕ,
ꁦꀑꁧꄩꏭꂷꋐꌠꂷꋐꂷꑎꌠꂷꑎ,
ꁦꀑꇆꆉꏮꄺꀱꄻꌠꄺꀱꄹꑷꌩꄻꌠꑷꌩꄹ,
ꉠꀉꃰꅿꀻꑳꀋꐥꍇꌠꌩꌌꑳꂿꉼꏒꀕꌠꐛ。
ꄚꉢꇬꉨꀋꀬ
ꇬꉨꀋꀬꌠꆏ,
ꌞꊿꑶꌩꏷꑻꀕꀐꇬꉠꀉꃰꃅꌗꋠꆈꏸꀕꌠꏦ
ꌞꊿꄅꀱꑻꈭꀕꀐꇬꉠꀉꃰꄅꀱꈂꏯꌬꌠꏦ
ꀋꏦꇊꀋꏦ
ꉠꀊꃯꉌꂵꂄꑭꑌꌳꉔꌳꄏꌠꉨꀋꏦꀞ
ꃮꌉꌠꑌꌐꀋꄿꋭ
ꃮꐗꌠꑌꌐꀋꄿꋭ
ꃮꎸꃅꌠꑌꌐꀋꄿꋭ
ꊌꃅꊌꉆꇬꆹ
ꀊꃯꃮꉘꀋꄉꑟꁈ
ꀊꃰꎧꒉꏾꀋꄉꑟꁈ
ꀉꃰꏤꅇꋌꀋꎺꀐꑠꁈ
ꄮꈉꒉꀕꌡꄡꑟꄹ
ꏛꃅꀱꇁꆺꑳꏂꃴꑟꄡꑟꄹ
ꏛꃅꀱꀉꃰꏢꁮꁧꄡꑟꄹ